ÇÎROKA MIN
Kurteyeke ji jiyana Rotînda Yetkîner û rêgeha wî di muzîka Kurdî de.
Ez di sala 1962’an de li navçeya Gimgim a Muşê hatime dinê. Spasdarê dê û bavê xwe me ku, wan ez bi çanda kurdewar mezin kirime. Heya neh saliya xwe li Gimgimê jiyam. Dengbejên Kurdan û radyoya Erîvanê, ji bo min bûn reberên hunera muzîkê û bingeheke dewlemend. Bi taybetî bavê min bi xweşbûna dengê xwe û bi xwesteka kû ez jî ji bingeha dewlemend a muzîka Kurdî para xwe bistînim, pir alîkarî dida min. Gelek caran li cemaeta Dengbêj Şakiro amade bûm û min li dengê wî û dengbêjên din zindî guhdarî kir. Dema min li wan guhdarî dikir, min ji xwe re digot ez ne wekî wan be jî, divê ez bi awayek ji awayen stranan bi çîrokan bixemilînim.
Ji ber hin sedeman em di sala 1971’ê de koçberê bajarê Anatoli Enqerê bûn. Min heya neh saliya xwe jî ji çend peyvan zêdetir bi tirkî nedizanî. Ne bi daxwaza min be jî, li wî bajarî fêrê zimanê tirkî bûm. Bi fêrbûna zimanê tirkî û çûyîna bajarên weke Enqere, Manîsa û Îzmîrê, cîhanek nû li ber min vedibû. Min êdî muzîka gelek welatên din jî ji radyoyan guhdarî dikir û nas dikir. Cara yekemin ji hunermendên radyoya Îzmîrê perwerdeya muzîkê dît. Di salên min ên xwendina zanîngehê de, li Îzmîrê, ketim nava koroya Avnî Anil û di wê demê de min muzîka ku Osmanliyan ji hemû gelên rojhilat û rojava berhev kirî û bi navê muzîka saray kom kirî nas kirin û di warê maqaman de bûm xwediyê gelek agahiyan.
Cara yekem wek profesyonel di 17 saliya xwe de bi zimanê biyaniyan derketim ser dikê. Lê ji ber ku malbat pir girêdayê Kurdewariya xwe bû û ez jî wisa mezin kiribûm, min nedixwast ku ez wek stranbejek Tirkan bêm nasîn. Lewma heya ku nasîna min bi Tevgera Azadiyê re çêbû, dikarim bêjim min veşartî stranbejî kir.
Li dû perwerdehiya bi zimanê tirkî 16 salan, min li zanîngehê beşa aborî qedand. Di salên 1989 û 1991’ê de li Stenbolê du sal li dibistana Tîmûr Selçuk û a Arîf Sag min perwerdehiya armonî, şan û tembûrê stend. Sala 1989’an min nasnemaya xwe a rast bi nasîna Tevgera Azadiyê bidest xist û sala 1991’ê di damezirandina Navenda Çanda Mezopotamya de min cîh girt. Min sê salan li wêderê memostatiya muzîkê û perwerdehiya koroya zarokan kir. Min û Merdan Zirav yekemin Koma resmî a NÇM Koma Mezrabotan ava kir, dûre Rojbîn, Serap û Alî Taniş tevlî me bûn.
Di navbera salên 1994 û 2001 de li bihişta dine, li nava jiyana gerîlayên Kurdistanê mam û bingeha muzîka min li van çiyayan pêşket û dewlemend bû. Dîsa sala 1995 û 1996, sal û nîv, min di yekemîn televîzyona navneteweyî ya Kurdan MED TV de xebat meşand. Heya niha 12 albûmên min hatine weşandin; ji wan 3 bi Koma Gulên Mezrabotan bi zarokan re, Çar Sterk û Kedkar wek Koma Mezrabotan. Sîser, Naygotin, Li Te Geriyam, Jan-Ar, Koîro, Jin û Jiyan û albûma Heval jî min solo çêkir. Wekî din min bi dehan projeyên ku bi hejmarek zêde stranbejên me tê de cîh girtîne çêkirin: wekî Ya Star, Nabihîsin, Rojava, Yekitî û stranên ji bo hibijartinê.
Ev 35 sal in ku ez xebatkarekî muzîka Kurdî me. Di van salan de bi her awayî heval Merdan Zirav wek aranjor, sazbend û hevrê bi min re bû alîkar. Spas ji bo keda wî. Ev pirtûk jî dîsa Merdan bi kedeke mezin amade kir. Niha bi dehan stranbêj stranên min dibejin. Ev ji bo min kêfxweşiyeke mezin e û ez qimete mezin didim wan stranbêj û hunermedan. Rotînda Yetkîner. 21. 03. 2025
Stran û albûm
Li jêr hin klîbên bijartî yên Rotînda ye û li ser YouTube kanalê wî dikareten gelek albûm bibînin.
Bawerî
Sê Jinên Azad
Nota pirtûka dijîtal
Ev pirtûk ên notar û çîrokan yên Rotînda Yetkîner li hev dihîne. Versiyona PDF a dijîtal ji vir ve dikarî bikirrî.
Piştî ku parê danîn, hûn dikarin pirtûka PDF bi girêdana taybet daxînin (girêdan nêzîkî 30 deqîqe dixebite). Heke pirsgirêkek reş derket, ji kerema xwe re bi merdan_z@hotmail.com re têkiliyê bide.
Têkilî
Ji bo konser, civîn, fermanên pirtûkê an pirsên din yên derbarê xebata Rotînda Yetkîner de, dikarin bi e-peyamê bikevin têkiliyê.
Ev navnîşan nivîsandina fermanên PDF, daxwazên pirtûkê û peyamên têkiliyê ji hêla Merdan Zirav ve parastî dike.